By Инфоњуз 
Министерот за надворешни работи, Тимчо Муцунски, денеска појасни дека одлуката на САД за пауза во обработката на имигрантски визи за граѓани од 75 земји, вклучувајќи ја и Македонија, не значи црна листа ниту целосен прекин. Тој истакна дека ова не влијае на другите типови визи за САД.
– Доколку сте стопанственик и сакате да патувате во Америка, можете да аплицирате за виза. Студентите и учесниците на „Work and Travel“ или туристите исто така немаат ограничувања – рече Муцунски.
Министерот појасни дека квотата за иселенички визи е мала, главно за повозрасна категорија граѓани, и дека Амбасадата на САД во Скопје е во постојана комуникација со Стејт департментот.
Муцунски потенцираше дека одлуката треба да се гледа во поширок контекст на соработката со САД:
– Оставете време и доверете се во нашата комуникација со стратешкиот партнер. Во наредните месеци може да следат позитивни промени во визната политика на САД кон Македонија. Граѓаните не треба да се грижат – рече шефот на македонската дипломатија.