By Инфоњуз 
Од почетокот на следната година, граѓаните ќе плаќаат повисока партиципација за дел од здравствените услуги, најави директорот на Фондот за здравствено осигурување (ФЗО), Сашо Клековски, на денешната средба со медиумите.
Тој појасни дека по повеќе од една деценија одложување, Фондот донел одлука за корекција на референтните цени за основниот специјалистички и интернистички пакет, и тоа и во јавните и во приватните здравствени установи. Поради ова, од 1 јануари услугите за кои досега се плаќала пониска партиципација ќе имаат повисока цена.
Клековски нагласи дека станува збор за симболично зголемување на учеството на граѓаните, кое изнесува околу десетина денари по услуга. Како што потенцираше, ова не значи дополнителен приход за здравствените установи, туку промена во начинот на пресметка и реализација на средствата.
„Здравствените установи ги фактурираат услугите кон Фондот, но голем дел од нив не успеваат да реализираат ниту 80 отсто од одобрениот буџет. Главната забелешка беше дека услугите се потценети и поради тоа не можат да го исполнат буџетот. Со новите цени се овозможува пореално вреднување на нивната работа“, изјави Клековски.
Со корекциите, референтната цена за специјалистички преглед значително се зголемува, како и за повеќе други здравствени услуги. Така, специјалистички преглед со земање брис ќе има повисока цена, општиот ургентен пакет бележи поскапување, а зголемување има и кај одредени дијагностички услуги, како што е ехото на еден орган.
Од ФЗО наведуваат дека измените имаат за цел подобра валоризација на здравствените услуги, финансиска стабилизација на здравствените установи и поефикасно користење на здравствениот буџет.