By Инфоњуз 
Тринаесет деца од Основното училиште „Димо Хаџи Димов“ досега побарале медицинска помош на Клиниката за детски болести, а четири од нив сè уште се хоспитализирани, но се во добра здравствена состојба, соопшти директорот на Клиниката, Реџеп Мемеди.
Целосно се завршени анализите на водата земена од училиштето, а физичко-хемиската и микробиолошката анализа покажуваат дека водата е во рамките на референтните вредности, без присуство на тешки метали, соопшти Институтот за јавно здравје (ИЈЗ).
Сепак, анализа на биолошки материјал од седум примероци од деца кои пријавиле симптоми покажала присуство на норовирус кај шест од нив.
„Од мострите од храна и работни површини во училиштето беа пронајдени фекални бактерии Enterobacteriaceae во мусаката и на неколку површини во кујната и училиштето, што укажува на нехигиена“, соопшти ИЈЗ.
Дополнително, од девет тестирани чешми, три биле позитивни на бактерии од групата Enterobacteriaceae – едната во кујната и две во училници, истакна директорката на ИЈЗ, Марија Андоновска.
Директорот Мемеди потсети дека седум деца биле хоспитализирани со симптоми како стомачна болка, дијареа, повраќање и температура. Три од нив веќе се пуштени дома, а четири продолжуваат со болнички третман. Се очекува сите да бидат отпуштени до понеделник, по добивање стабилна здравствена состојба.
ИЈЗ најавува дека за дополнителните мостри од другите девет училишта ќе информира во понеделник и дека е во постојана комуникација со надлежните институции за сите нови информации.