(Видео) Ново разочарување кај родителите од Кочани: Нѐ третираат како во административен записник

Александар Наунов, таткото на трагично загинатата Надица во пожарот во дискотеката „Пулс“, денеска ја сподели својата болка и горчина на Маршот на ангелите.

„Првото рочиште го дочекавме со надеж. Второто со треперење, а го испративме со тешко разочарување“, изјави Наунов пред медиумите. Тој нагласи дека постојаните одложувања воопшто не ја земаат предвид неизмерната болка на родителите кои ги изгубија своите деца и кои секој ден живеат со празнината што никогаш нема да се пополни.

Наунов посочи и на неправдите во судот, каде родителите биле ставени директно лице в лице со обвинетите, без никаква организација или заштита.

„Како да сме еднакви страни во нечиј административен записник, а не родители што ги изгубија своите деца“, рече тој.

Тој повика на професионалност, сериозност и човечност во понатамошната судска постапка, истакнувајќи дека е неопходно да се утврди одговорност за сите пропусти – вклучително и оние на полициските службеници.

„Нашите деца нема да се вратат, но за нив, за нивното име и спомен, ние нема да престанеме да бараме вистина и правда“, додаде Наунов.

Во завршницата од изјавата, тој побара итна и правична разрешница за трагедијата што ги однесе животите на 63 деца и им се заблагодари на граѓаните за поддршката:

„Заедно ќе ја добиеме правдата!“