By Инфоњуз 
Жители од Кисела Вода се жалат дека повозрасен маж редовно и без јасна причина се движи околу две-три станбени згради во населбата, пишува А1он. Според станарите, тој со денови се задржува во заедничките простории, седи на скалите и најчесто демне пред еден конкретен стан.
Дел од станарите велат дека неговото присуство не е ниту најавено, ниту оправдано, а ситуацијата станува алармантна кога на надзорните камери повторно е забележано истото лице пред еден од прозорците во вечерните часови.
Сопственикот на станот пред кој мажот најмногу се задржува најави дека ќе поднесе пријава до полицијата, при што ќе приложи видео-докази и дополнителни материјали за „ненормалното однесување“.
Тој вели дека се плаши од можно нападнување, бидејќи не ја знае причината зошто лицето, чиј идентитет го знае и според него било вработено во една државна институција, навечер постојано се движи околу зградата. Станарите исто така посочуваат дека лицето можеби е поврзано со инцидент од 2022 година, кога во истиот стан биле украдени околу 8.300 евра.
„Ќе бараме брза реакција, а институциите ќе треба да утврдат дали снимките укажуваат на дозволено дејство или се работи за неоправдано присуство кое може да прерасне во сериозен безбедносен ризик“, велат станарите за А1он.
Како што додаваат, жителите очекуваат надлежните конечно да реагираат и да ја расчистат ситуацијата пред таа да ескалира.