Лекарите му соопштија дека татко му починал, тој реагирал бурно – семејството тврди: „Не доби навремена медицинска помош“

По инцидентот во Клиничката болница во Штип, кога 29-годишниот Ј.А. од Таринци беше приведен поради оштетување на болнички инвентар откако му починал таткото, неговата сестра се огласи со своја изјава, во која тврди дека семејството со денови барало медицинска помош, но не било соодветно згрижено.

Според нејзините зборови, нивниот татко првпат се пожалил на градна болка и тешко дишење уште во саботата, кога, како што тврди, побарал помош од кардиолог, но наводно не му било укажано внимание.

„Му рекле дека тоа не е нивна надлежност, дека има трансплантиран бубрег и трахеостома и дека може да испие троодон за болката. Ни забележаа дека сме дошле во сабота, како докторите да се во хотел, а не во болница“, наведува таа.

Во следните денови, болките продолжиле, но, според семејството, од страв дека повторно ќе бидат вратени, не се обратиле повторно кај лекар. Во средата навечер состојбата се влошила – почнал да се гуши, по што била повикана Брза помош.

„Кога стигнав, лекарскиот тим веќе го изнесуваше татко ми, но тој беше без здив. Ми рекоа дека му дале адреналин и атропин, а подоцна дома видов дека биле дадени два урбасона. Ниту беше ставена венска линија, ниту можеше да се измери притисок, затоа што медицинскиот персонал бил во паника“, вели сестрата.

Таа дополнително тврди дека во возилото на Итната помош не било можно да се следат виталните параметри, а докторката наводно го заборавила медицинскиот прибор во дворот при поаѓање.

По пристигнувањето во болницата, ќерката вели дека не биле известени на време лекарите, а пациентот паднал заедно со болничкото лежиште додека персоналот се обидувал да реагира.

„Во афект почнав да викам, а од болницата ме избркаа и се заклучија. Потоа пристигна брат ми кој, гледајќи ја ситуацијата, во бес ја скрши стаклената врата“, раскажува таа, додавајќи дека братот се исекол на раката, но, како што вели, не нападнал физички никого.

По околу дваесет минути, семејството било информирано дека пациентот нема знаци на живот.

„Секој што изгубил родител би разбрал низ што поминавме“, завршува нејзината изјава.

Според семејството, пациентот во возилото на Итната помош не бил врзан, а целиот пат од Таринци до Штип се превезувал, според семејството „како компир“, во брзање и паника.

Полициските службеници интервенирале веднаш и го привеле Ј.А. поради оштетувањето на болнички инвентар. Телото на починатиот е предадено на обдукција по наредба на јавен обвинител, а случајот се документира. По завршување на постапката, против Ј.А. ќе следува соодветна пријава.