By Инфоњуз 
Синоќа на градскиот плоштад во Чачак настапи српската пејачка Ана Бекута, но наместо празнична атмосфера, концертот предизвика револт и незадоволство кај дел од граѓаните. Причината беше сумата од 4,5 милиони динари (околу 40 илјади евра) издвоена од градскиот буџет за едновечерниот настап, во време кога голем дел од Србија се соочува со проблеми поради обилните снежни врнежи и прекини во снабдувањето со електрична енергија.
Активистката од Чачак, Славица Петровска, јавно соопшти дека токму толкава сума била потрошена, по што информацијата брзо се прошири меѓу граѓаните. Дел од нив излегоа на плоштадот за време на настапот, не за да слават, туку за да протестираат против, како што велат, неодговорното трошење на јавни пари.
На видеата објавени на социјалните мрежи се гледа како пејачката за време на целиот настап се соочува со свирежи од публиката. Во еден момент, таа истакна дека вакво нешто не доживеала во текот на својата 40-годишна кариера. Иако немало физичка закана, освен свирежи и неколку фрлени снежни грутки, Бекута побарала интервенција од полицијата.
Концертот на крајот беше прекинат на сцената, а пејачката продолжи да пее од комбе, но тоа не го смири револтот на граѓаните, кои продолжија да ја опкружуваат и да ја исвиркуваат.
Реакциите доаѓаат само неколку дена по обилните врнежи од ледена дожд и снег, кои практично го парализираа Чачак. Надлежните служби, според сведоштва на граѓаните, доцнеле со интервенцијата. Во соседните Лучани беше прогласена вонредна состојба, а околу 4.000 жители останаа без струја поради дефекти предизвикани од силниот ветер и снегот. Во ваков контекст, одлуката на локалната власт да вложи значителни средства во прослава на Српската Нова година предизвика дополнителен гнев, со пораки дека забавата не може да биде приоритет додека граѓаните се соочуваат со основни егзистенцијални проблеми.