By Инфоњуз 
Разузнавачка служба од соседството пред повеќе од една година испратила информација до Агенција за национална безбедност дека на поранешниот вицепремиер Артан Груби му се заканува ликвидација од лице со криминално минато и врски во подземјето, брифираат извори запознаени со истрагата, јавува ТВ24.
Според истите информации, странската служба пресретнала комуникации кои укажувале на сериозна закана по животот на Груби, по што податоците биле доставени до АНБ. Агенцијата, согласно процедурите, ги проследила сознанијата до Министерство за внатрешни работи, а потоа тие по службен пат завршиле и во Основно јавно обвинителство.
По добиената дојава, на Груби му било доделено полициско обезбедување, кое го користел одреден период. Дел од овие информации се содржани во службени белешки што сега се земаат предвид во постапките поврзани со определување на мерката притвор.
Од надлежните институции засега нема официјална потврда за деталите, но посочуваат дека сите информации со кои располагале биле навремено споделени со Обвинителството, кое одлучува за понатамошните мерки.