By Инфоњуз 
Иако беше најавен за 1 февруари, почетокот на автоматското санкционирање на сообраќајните прекршоци преку системот „Сејф сити“ останува неизвесен. Причината е што сè уште не се усвоени измените на Законот за прекршоците, за кои е потребно двотретинско и Бадентерово мнозинство во Собранието.
ДУИ го кочи процесот
Клучната политичка пречка доаѓа од опозициската ДУИ. Без поддршката на пратениците од партијата на Али Ахмети, владејачкото мнозинство не може да го исполни уставниот услов за гласање според принципот на Бадентер.
Претседателот на Собранието, Африм Гаши, потврди дека меѓу пратеничките групи сè уште не е постигнат конечен договор. Според него, текстот на законските измени не е спорен, но недостига политичка согласност за нивно ставање на дневен ред на пленарна седница.
Доколку измените на законот бидат усвоени, возачите ќе се соочат со значителни промени во начинот на санкционирање и со построги казни:
- Дигитална достава на казни – наместо препорачани писма, прекршочните налози регистрирани од камерите ќе се доставуваат преку СМС-порака, е-пошта или дигитална апликација, со линк за преземање.
- Трајно одземање на возила – предвидена е оваа мерка за возачи фатени под дејство на алкохол или наркотични средства.
- Поништување на возачка дозвола – за најтешките сообраќајни прекршоци се предвидува целосно престанување на важноста на возачката дозвола.
Одложувањето на законските измени директно го пролонгира и целосното активирање на системот „Сејф сити“. Без соодветна правна рамка, системот нема да може законски да ги процесира и доставува казните, со што неговата основна функција останува неактивна.