By Инфоњуз 
Универзитетскиот професор Дејан Трајковски предупредува дека македонското здравство е во длабока структурна криза. Иако земјата има околу 350 лекари на 100.000 жители – бројка речиси идентична со европскиот просек – речиси половина од нив работат во приватниот сектор, каде услугите се скапи и најчесто не се покриени од осигурувањето.
„За обичниот пациент е исто како да немаме лекари. Иако бројката на хартија е добра, пристапот е ограничен“, вели Трајковски.
Тој посочува дека приватните болници за време на ковид-пандемијата оствариле профити од 20–30%, што ја претвора здравствената заштита во високопрофитабилен бизнис. Резултатот е двојно здравство – квалитетно за богатите и минимално за сиромашните, а јавниот сектор се празни од кадар.
Како решенија, Трајковски предлага референтен ценовник со ограничени цени за основни услуги, транспарентни ценовници, вклучување на приватните болници во системот на ФЗОМ и можност фондот да покрива услуги и во приватниот сектор. Дополнително, сугерира и ограничување на профитната маржа или посебен данок за приватното здравство, чиј приход би се пренасочувал кон јавните клиники.