By Инфоњуз 
Швајцарските власти ја продолжуваат истрагата и идентификацијата на жртвите од пожарот што во новогодишната ноќ го зафати барот „Ле Констелацион“ во Кран-Монтана, при што загинаа најмалку 40 лица, а 119 се повредени. Четири дена по една од најтешките трагедии во поновата историја на земјата, надлежните институции продолжуваат со тешката задача за идентификација на жртвите, додека истрагата за причините за пожарот добива на интензитет, пишува швајцарскиот портал Le Nouvelliste.
Државното обвинителство покрена кривична истрага против двајца раководители на објектот, поради сомнение за убиство од небрежност, нанесување телесни повреди од небрежност и предизвикување пожар од небрежност. Досега се идентификувани телата на 24 жртви, претежно млади лица, кои им се предадени на нивните семејства.
Идентификувани уште 16 жртви
Кантоналната полиција на Вале во неделата соопшти дека се идентификувани телата на уште 16 жртви од стравичниот пожар. Станува збор за четири Швајцарки на возраст од 14, 15 и 18 години, како и шест Швајцарци на возраст од 16 до 31 година. Меѓу нив е и Стефан Ивановиќ (31), државјанин со двојно – швајцарско и српско – државјанство, кој работел како обезбедување во барот.
Меѓу идентификуваните се и двајца 16-годишни Италијанци, еден 16-годишен државјанин на Италија и Обединетите Арапски Емирати, перспективниот италијански голфер Емануеле Галепини, како и 18-годишен Романец, 39-годишен Французин и 18-годишен Турчин. Со ова, вкупниот број на идентификувани жртви се искачи на 24.
Од полицијата информираат дека истрагата и постапките за идентификација на останатите жртви интензивно продолжуваат.