By Инфоњуз 
Грчките власти веќе речиси еден месец трагаат по исчезната 16-годишна тинејџерка од Германија, која неодамна со своето семејство се преселила да живее во Грција.
Станува збор за Лаура, која последен пат била видена на 8 јануари во близина на градот Патра. Според најновите информации од грчката полиција, постојат сериозни индиции дека девојчето можеби уште истиот ден ја напуштило земјата и отпатувало за Германија, објави весникот „Катимерини“.
Истрагата покажала дека Лаура непосредно пред исчезнувањето го продала својот мобилен телефон, со што го отежнала нејзиното лоцирање. Со добиените пари со такси се упатила кон Атина, а еден ден претходно ги избришала сите свои профили на социјалните мрежи.
Полицијата утврдила дека девојчето преку туристичка агенција во областа Омонија купило авионска карта за Франкфурт, за која во готово платило нешто повеќе од 200 евра. Камерите во агенцијата ја снимиле трансакцијата и го потврдиле нејзиниот идентитет. Се претпоставува дека од таму со автобус била пренесена до меѓународниот аеродром во Атина.
Иако постојат докази дека Лаура купила карта и планирала патување, авиокомпанијата сè уште не доставила официјална потврда дали таа навистина се качила на летот. Според портпаролката на грчката полиција, Константија Димоглиду, во моментот немало обвинителска наредба што би ја обврзала компанијата на итна соработка, бидејќи случајот формално не се води како кривично дело.
– Кога родителите околу 20 часот го пријавиле исчезнувањето, можно е девојчето веќе да било слетано во Германија – изјави Димоглиду, додавајќи дека и понатаму се разгледуваат сите можни сценарија.
Грчката полиција преку Европол стапила во контакт со германските власти, кои потврдиле дека Лаура не се наоѓа кај својот брат, но се во состојба на подготвеност доколку биде пронајдена на територијата на Германија.
Причините за исчезнувањето сè уште не се целосно познати. Според сведоштво на блиска пријателка, Лаура тешко се прилагодувала на животот во Грција по преселбата, имала проблеми со јазикот, новата средина и училиштето. Роднини во Германија, пак, наведуваат дека односот со таткото бил конфликтен и дека поради семејни проблеми таа во минатото била привремено сместена во установа.
Потрагата по девојчето продолжува, а грчките и германските институции остануваат во координација.