By Инфоњуз 
Почна исплатата на средства од апликацијата МојДДВ за скенираните фискални сметки за четвртото тримесечје од 2025 година, информира Управата за јавни приходи (УЈП).
Како што посочуваат од УЈП, за четвртиот квартал од 2025 година ќе бидат исплатени вкупно 924,5 милиони денари кон 526.123 корисници на апликацијата МојДДВ.
– До денес се реализирани 184,5 милиони денари кон 104.000 корисници на апликацијата. Исплатата на средствата продолжува – како што се обработуваат налозите, така се уплаќаат средствата на сметките на корисниците на МојДДВ, велат од УЈП.
Напоменуваат дека во овој момент 5.292 корисници кои скенирале фискални сметки имаат внесено погрешна трансакциска сметка, поради што не можат да ја реализираат исплатата.
– Доколку не сте добиле средства, проверете ги и ажурирајте ги податоците за трансакциската сметка директно во апликацијата МојДДВ. На тој начин, УЈП ќе има точни податоци за корисникот и ќе може да изврши исплата на поврат по основ на МојДДВ, апелираат од Управата за јавни приходи.