By Инфоњуз 
Пратениците изгласаа пакет закони што ќе овозможи целосно функционирање на системот „Безбеден град“, јавува Вечер.мк. Усвоени се измените во Законот за возила, Законот за полиција, Законот за извршување санкции и Законот за безбедност на сообраќајот, додека измените во Законот за прекршоци сè уште се разгледуваат во второ читање. Покрај тоа, се предложени и измени во Кривичниот законик за усогласување со новиот систем.
Според новите решенија, целата постапка за санкционирање на сообраќајните прекршоци е детално уредена – од констатирањето на прекршокот до изрекувањето на најстрогите мерки. Возачите што трипати ќе добијат правосилна забрана за управување со возило од иста категорија во рок од четири години ќе останат без возачка дозвола, а судот ќе ја одземе дозволата и ќе ги спречи да полагаат повторно најмалку една година. По одлуката, МВР ќе ги извести возачите преку СМС и имејл.
Новите закони воведуваат систем на негативни поени, обврска за ажурирање на контакт информации, толеранција при мерењето на брзината, забрана за управување под дејство на дроги и психотропни супстанции, како и дополнителни обврски за автошколите. Се воведуваат „зона училиште“ и „зона 30“ за смирен сообраќај.
Измените во Кривичниот законик предвидуваат задолжителна забрана за возење за тешки дела во сообраќајот, со можност за одземање на возилото од сторителот. Казни се предвидени и за учесници во недозволени трки, за управување без положен испит или важечка дозвола, како и за управување со алкохол над 1,5 промили или под дејство на дроги.
Со новите решенија, сторителите на прекршоци ќе добиваат известување преку СМС и имејл, а доколку казната ја платат во првите осум дена, ќе платат само половина. Системот „Безбеден град“ треба целосно да профункционира од 1 февруари, овозможувајќи побрзо санкционирање и зголемена безбедност во сообраќајот.