By Инфоњуз 
Микробиологот Никола Пановски ги објасни причините за труењето кај учениците во ОУ „Димо Хаџи Димов“ и појасни дека присуството на бактерии во мусаката што ја јаделе децата не мора да значи ништо сериозно, бидејќи храната била испечена.
„Тоа укажува на нехигиена – некој можеби допрел дел од мусаката со нечисти раце. Кога зборував за ентеробактерии, мислев на сценарио во кое меленото месо претходно е загадено со салмонела, а при печењето би останале доволно бактерии за да предизвикаат симптоми. Но, ентеробактеријата сама по себе не кажува ништо конкретно, бидејќи ова е голема фамилија со над сто видови бактерии“, објаснува Пановски.
Тој додава дека видови како Ешерихија коли, Клепсиела и Протеус ги имаме сите во големи количини. Иако постојат и опасни видови, 99% не претставуваат ризик. Во оваа група се и бактерии како салмонела и шигела, па присуството на ентеробактерии, дури и во чешмите, најчесто е индикатор за недоволна хигиена и пренесување преку неизмиени раце.
„Да беше пронајдена салмонела, тоа би бил друг муабет. Сепак, нормално е дека децата треба да ги мијат рацете по излегување од WC, а тоа важи и за возрасните. Во случајов станува збор за нехигиена, а не за опасни бактерии“, посочува д-р Пановски.
Според него, во испечената мусака нема доволно живи бактерии кои би можеле да предизвикаат труење кај толку голем број деца.