By Инфоњуз 
Авторот на култната емисија „Јади бурек“, Јанко Илковски, соопшти дека шоуто престанува да се емитува и дека сценографијата е ставена на продажба. Во објава на социјалните мрежи, Илковски откри дека по повеќе од две децении во медиумите – нема осигурување, ниту доволно стаж за пензија.
„Имам само пет години стаж. Никогаш ниедна телевизија не ме вработи. А оние што ме вработија – не плаќаа придонеси“, напиша тој, додавајќи дека целиот свој работен век го поминал како хонорарец, без каква било социјална сигурност.
Илковски соопшти дека целата сценографија од студиото на ТВ Сонце е ставена на продажба – панели, позадина, голема маса, стаклена маса и полица – со исклучок на столиците. Сè се подига лично од студиото, а цената, како што наведува, е „колку побргу, толку поевтино“.
„Ако никој не ја земе, ќе си ја соберам дома – ама тогаш цената ќе биде многу повисока поради транспортните трошоци“, додава тој.
За состојбата во ТВ Сонце, Илковски вели дека не е надлежен да открива детали:
„Никогаш не бев вработен таму, вечен хонорарец. Немам никаква потреба да објаснувам за судбината на телевизијата.“
Во објавата наведува и дека засега нема интерес од друга телевизија да ја преземе емисијата, а нема ниту услови за самостоен стриминг – нема спонзори, а моделот „pay-per-view“, вели тој, не може да покрие ни сметка за интернет.
До тогаш, емисијата останува без термин и без телевизија што би ја продолжила.