By Инфоњуз 
Мажот осомничен за бруталниот напад врз 67-годишна жена во Нов Белград, кој вчера ја избоде со нож и потоа ѝ ја одзеде чантата, е уапсен попладнево, по интензивна полициска потрага што започна веднаш по нападот.
Според медиумски информации, осомничениот претходно бил забележан на трафика во Белград, каде наводно купувал сок со пари украдени од нападнатата жена. Во моментот на забележувањето имал променет физички изглед – за разлика од видеоснимката од вчера, на која имал брада и капа, денес бил избричен и без капа, иако сè уште носел иста облека.
Нападот се случил вчера насред бел ден, на влезот од станбена зграда во Нов Белград, додека жената се движела со дете, најверојатно нејзин внук, на возраст до седум години. Кога почнала да се качува по скалите, напаѓачот одеднаш ја нападнал, ѝ задал повеќе убодни рани, насилно ѝ ја искинал чантата од рамото и побегнал.
Настанот е снимен од безбедносна камера во ходникот на зградата, а снимката е оценета како исклучително вознемирувачка. Камерите од околните објекти во Блок 37 го регистрирале движењето на осомничениот пред и по нападот, што, според информациите, значително ѝ помогнало на полицијата во неговото лоцирање и апсење.
Повредената жена веднаш била пренесена во Ургентниот центар, каде лекарите констатирале дури девет убодни рани – три во пределот на десната клучна коска, една во левата, четири во левото рамо и една во главата, како и пневмоторакс. По укажаната медицинска помош, таа била сместена на одделот за интензивна нега.
И покрај сериозноста на повредите, лекарите информираат дека нејзиниот живот не е загрозен и дека таа е во стабилна состојба, но и понатаму останува под медицински надзор и ќе бидат направени дополнителни анализи.