By Info News 
Премиерот Христијан Мицкоски ја потврди информацијата дека неговиот син бил еден од учениците кои добиле труење во училиштето „Димо Хаџи-Димов“ во Карпош.
Како што вели, синот сега е во добра состојба, откако три дена примал инфузии.
„Антони беше дел од таа група кое им се случи труење. Имаше медиуми дека бил во тешка состојба, сакам да демантирам, имаше симптоми како и сите други деца. Да, беше жртва на тоа труење, три дена примаше инфузија, три дена не одеше на учичиште. Тој е храбро и пргаво момче, сака да се дружи, и претпоставувам дека сите меѓу себе биле на ручек, конзумирале иста храна. Оставам институциите да кажат дали е од храната или од нешто друго. Како што знам од Агенцијата за храна и ветеринарство ги прават тие неопходни испитувања, и апелирам да почекаме да не даваме суд. Денеска син ми е веќе подобар, и очекувам од понеделник да се врати на училиште“, рече Мицкоски.
Водата во Основното училиште „Димо Хаџи Димов“ во скопската Општина Карпош е целосно безбедна за употреба и ги исполнува сите стандарди за квалитет на вода за пиење, соопшти ЈП „Водовод и канализација“ – Скопје. Потврдата доаѓа два дена откако околу 40 ученици пријавија стомачни болки, меѓу кои и помладиот син на премиерот Христијан Мицкоски.
Според претпријатието, на 26 ноември бил извршен вонреден мониторинг по пријава од училиштето. Земени биле четири примероци од две локации – училница и кујна – за физичко-хемиски и микробиолошки анализи. Сите резултати се во согласност со правилникот за безбедност и квалитет на вода за пиење.