By Инфоњуз 
Многу граѓани не ги добија средствата од скенирањето фискални сметки за јули, август и септември, иако вчера беше последниот рок за исплата. УЈП тврди дека налозите за 370 милиони денари се подготвени.
Во минатото, исплатите стигнуваа најдоцна до 10-ти, а сега рокот е до крајот на месецот. Граѓаните велат дека редовно ја користат апликацијата и немале проблеми со трансакциските сметки.
Управата за јавни приходи (УЈП) без одговор зошто голем дел од македонските граѓани не ги добија своите средства кои им следуваат од скенирањето на фискални сметки.
Од друга страна апликацијата МојДДВ денеска во поголемиот дел од денот не функционира, односно граѓаните не можат воопшто да скенираат сметки.
Во минатото, средствата беа исплаќани најдоцна до 10-ти во месецот. По доаѓањето на актуелната влада на ВМРО-ДПМНЕ, тој рок се продолжи до крај на месецот. Не е сигурно дали воопшто ќе се исплатат средствата од понеделник, 1 декември.
Еден квартален поврат може да достигне 2.100 денари по лице, што за четиричлено семејство изнесува до 8.400 денари. Граѓаните се разочарани и се прашуваат каде „испарија“ средствата и дали мерката ќе продолжи.
„Срамота, ги штедев за децата, а сега не ги добивме“, вели мајка на две деца. Пензионери и студенти исто така изразија разочарување. Јавноста очекува одговор од УЈП и Владата за исплатата и иднината на мерката.