Заврши рокот, голем дел од луѓето останаа со празни раце – за првпат, поголемиот дел од граѓаните не ги добија средствата од „Мој ДДВ“

Голем број граѓани денеска не ги добија средствата од „Мој ДДВ“, иако ова беше последниот рок за исплата. Вакво пробивање на рокот се случува првпат од воведувањето на мерката, која важи за една од ретките што враќаат пари директно кај граѓаните.

Станува збор за редовниот поврат за последниот пресметковен период – јули, август и септември – што на граѓаните им се исплаќа на трансакциска сметка врз основа на скенираните фискални сметки.

Досега средствата редовно стигнуваа најдоцна до 10-ти во месецот. По доаѓањето на актуелната влада на ВМРО-ДПМНЕ, рокот беше продолжен до крајот на месецот. Но заклучно со денешниот ден, кој е и последен работен ден оваа недела, исплатата ќе доцни, а не е извесно дали средствата ќе пристигнат од понеделник, 1 декември.

Управата за јавни приходи информираше дека до вчера се исплатени 552 милиони денари, а налозите за уште 370 милиони денари се подготвени. Директорката Елена Петрова посочи дека кај дел од корисниците исплатата може да касни поради технички причини, како невалидни трансакциски сметки.