By Инфоњуз 
„Токму го примив повикот кој ниту еден татко никогаш не би смеел да го прими. Тапа, неизречлива бол: мојата сакана Кјара повеќе ја нема“, изјави Андреа Костанцо, татко на 16-годишната Кјара Костанцо од Милано, една од жртвите во смртоносниот пожар во ноќниот клуб „Ле Констелејшн“ во швајцарскиот ски-центар Кран-Монтана, пренесува „Кориере“.
Костанцо заедно со сопругата се упатил кон Сион, каде што работи заедничка швајцарско-италијанско-израелска работна група задолжена за ДНК-идентификација на телата на загинатите. Како што им објасниле надлежните, постапката за идентификација се обидуваат да ја забрзаат, но научните анализи бараат време.
„Неприродно е татко да ја изгуби ќерката“
До последниот момент, вели таткото на Кјара, постоела надеж дека девојчето е меѓу повредените кои биле пренесени во болниците, но сè уште не биле идентификувани. Таа надеж згаснувала со секој изминат час, сè додека не пристигнал повикот кој, како што вели, „му го срушил целиот свет“.
„Никој никогаш не е подготвен за ваква вест. Неприродно е татко да ја изгуби ќерката“, рече тој.
Кјара Костанцо била ученичка во природно-математичката гимназија „Морески“ во Милано, каде што била одлична ученичка со просек 8,5. Не учела од обврска, туку од љубопитност и желба да разбере. Била омилена меѓу професорите и соучениците, оставајќи, како што вели нејзиниот татко, „секогаш нешто добро зад себе“.
Се занимавала со спорт, била успешна уметничка гимнастичарка и одлична скијачка, ја сакала природата и течно зборувала англиски јазик. Во семејството била исклучително блиска со своите тројца браќа, а родителите со неа, како што истакнува таткото, никогаш немале сериозни проблеми. Била ведра, духовита, полна со интереси и силни вредности.
Во клубот биле и претходно
„Имаше јасна претстава за здрав начин на живот. Не ѝ се допаѓаа алкохолот ниту пушењето, а за дроги немаше ни збор. Имаше многу силно чувство за правда и одговорност“, рече Костанцо, додавајќи дека Кјара во многу нешта дури ги надминувала родителските очекувања.
Во ноќта на трагедијата, Андреа Костанцо се наоѓал во Милано, додека неговата сопруга била во семејната куќа во Кран-Монтана. Кјара во ноќниот клуб „Ле Констелејшн“ отишла со пријателите речиси случајно, бидејќи во другите локали немало место. Клубот не им бил непознат – таму биле и претходно.
„Мојата ќерка никогаш не би прифатила да оди на небезбедно место“, рече нејзиниот татко, истакнувајќи го нејзиното високо чувство за одговорност и претпазливост.
Додека истрагата за причините за пожарот сè уште трае, таткото на Кјара вели дека болката во овој момент е поголема од каква било мисла за правда.
„Не знам дали таа некогаш ќе дојде. Сега чувствувам само огромна празнина“, рече тој.
За него е важно Кјара да не остане само едно име на списокот на жртви на големата трагедија.
„Таа никогаш не беше број. Беше сакана ќерка, личност која знаеше да слуша и да им дава на другите, без да се истакнува себеси и своите успеси. Токму затоа сите ја сакаа. И затоа нејзината загуба боли уште повеќе“, изјави Андреа Костанцо.