Во мусаката и на три чешми во училиштето „Димо Хаџи Димов“ во Влае најдени фекални бактерии

Во примерокот од мусаката што била послужена во првата смена во основното училиште „Димо Хаџи Димов“ во скопската населба Влае, утврдено е присуство на грам-негативни бактерии од групата Enterobacteriaceae. Според Институтот за јавно здравје (ИЈЗ), истите фекални бактерии биле откриени и на три чешми во училиштето, што укажува на поширока контаминација во објектот.

Од ИЈЗ соопштуваат дека веднаш по денешната прес-конференција пристигнал нов лабораториски резултат, со кој се потврдува дека и прехранбениот примерок е контаминиран. Анализите продолжуваат, а во институцијата пристигнуваат нови материјали и мостри, кои веќе достигнале значителен број.

На прес-конференцијата, ИЈЗ даде преглед на сите активности што ги преземаат надлежните институции – Агенцијата за храна и ветеринарство, Државниот санитарен и здравствен инспекторат, Центарот за јавно здравје – Скопје и Детската клиника. Сите служби се во постојана координација додека траат анализите на примероците од храна, вода, работни површини и од вработените во кујната.

Инцидентот беше пријавен на 26 ноември, кога голем број ученици добија стомачни тегоби и се пожалија на симптоми, по што беше активирана целосна инспекциско-здравствена постапка. Дополнителни резултати од дел од земените мостри се очекува да бидат објавени во текот на денот.